غزل ترکی) قره قشلاق
بیر کؤیول سینه مه ایستیر یئنه داغ تک اوتورا
دونیا! یول وئر، آرا آچ، گئت قیراغا، چک اوتورا
ماسوی اللّهی تک آللّاه هامیلیخ جوت یارادیب
نیه انسان آرادا تک یاشیا، تک اوتورا؟
عقل عبّاسی وئریب دستور اورک سلماسینا
بو گئنیش چؤلده فقط طایفۀ لک اوتورا
بیر دکل واردی لکستان وسطینده، هر گون
گؤرمسم آز قالار احساساتیما لک اوتورا
هر باخاندا گئدرم گؤیلره، الهام آلارام
خاصه اوستونده اوتوز_قیرخ دنه لک لک اوتورا
قره قیشلاقدی، منیم طبعیم اویاندان قاینار
یازارام آدینی تا دفتره گؤیچک اوتورا
گؤروم آرتا زمی بارلاری، قیزیل توخلولاری
دورنالار گؤیده اوچا، گؤللره اؤردک اوتورا
قره دیر چون کی مقدّسدی، شهیدلر یئریدی
اولمویا هئچ ایگیت اؤز دینیله منفک اوتورا
بوردا ایرانیله روم غائله سی اوز وئرمیش
دئییلیب دستانی داغلار دؤشونه حک اوتورا
بوردا مسعود دیوانین قبریدی کی قانلا یازیب:
قویمایین یاد بولوتوندان باغا شمشک اوتورا
قویمایین پاک قانیزی ناپاک الیله تؤکوله
شهریار تختینین اوسته گله دلقک اوتورا
آریلار قونسادا شهدین سوراجاخ، بال وئره جاخ
آمّا انصاف دیی گول اوستونه میلچک اوتورا
بیز قوناخ بسلمیشیخ، آمّا وطن ساتمامیشیخ
یاراماز بیر دفعه لیخ آت گئده، اشّک اوتورا
سانکی رنگین کمانین هر بویاغی اؤز یئری وار
قویما ذهنینده بیر آزجا بو سؤزه شک اوتورا
«شهسوار» ائیله وطن ساخلاماغین حقّین ادا
ائله کی قوللوغونا یوزلر اتابک اوتورا.
